الرئيسية
عمر و منى مشيين على الكورنيش .. الجو حار .. الشمس محرقة
منى : عطشانة
عمر : وأنا كمان
منى : يعنى ... عايزة اشرب
عمر : أكيد مادام عطشانة يبقى عايزة تشربي
منى : المفروض – بما أن عندك إحساس يعنى – إني لما أقولك عطشانة تجيب ليا حاجة ساقعة
عمر : ومين اللي هيحاسب ؟؟
منى : أنت طبعاً
عمر : منين ياحسرة .. ماانتى عارفة الكانز وغطاه
منى : ماقلتش عايزة كانز .. كفاية إزازة صاروخ
عمر : طب لو هاتجيبى اعزمينى معاكى .
منى : يابنى أنت مابتحسش ، وبعدين بقالنا 3 ساعات ماشيين ، أنت مش ناوي تقعدنا ولا إيه؟
عمر : عندك الكورنيش كله .. اختاري الرصيف اللي يعجبك
منى : قصدي تعزمنى في مكان شاعري
عمر : في الحر ده .. ماينفعش
منى : بلاش دى .. نأخد مركب عالكورنيش
عمر : المراكب بتغرق اليومين دول .. خلينا ع البر أحسن
منى : بلاش المركب تعالى نأكل ترمس .. أظن ده رخيص
عمر : إنتى تضمني منين إن الراجل غاسل إيده وغاسل الترمس
منى : أعوذ بالله .. إنت مقفلها كده ليه ؟؟
عمر : بصراحة معييش فلوس
منى : يا سلام!! .. ماأنت كان معاك إمبارح
عمر : إمبارح دخلت السينما مع بنت حلوة كده فالفلوس خلصت
منى : بنت حلوه ؟؟!! وبتقولها في وشى
عمر : أكذب عليكى يعنى
منى : لأ .. تحرق دمى أحسن
عمر: أنا مش شامم ريحه شياط يعني
منى : يخرب بيت البرود
عمر : برود إيه ؟؟ ماهو الجو مولع أهو
منى : إنت اللي بارد
عمر : بارد إزاى ؟؟ دا أنا بشُر عرق
منى : بقولك إيه .. روحنى
عمر : أروحك ؟! هو إنتى ماتعرفيش تروحي لوحدك
منى : آآآآه .. طب أنا ماشية
عمر : ليه يا حبيبتي؟؟
منى : حبك برص
عمر : والله البرص بيفهم عشان حبني
منى : بجد كده كتير
عمر : كتير إيه ؟؟
منى : إرحمنى .. واضح إن الحر بيجى معاك بالعكس .. يا بارد
عمر : يعنى مصممة تمشى ؟؟
منى: أيوة وحالاً كمان
عمر : طب استني لما نوصل آخر الشارع
منى : اشمعنى ؟؟
عمر : أصل أنا ساكن هناك .. و مايرضكيش أروح لوحدى
منى : لااااااااااااااااااااااا
عمر : ينفع كده ترمي نفسك في الميه مين هايوصلني بقى
